Madamo ang nakibot sang nabalitaan nila nga ining mainalamon nga tawo nga si Anastacio "Boy" Martirez nag-resign bilang presidente sang Libery Telecoms, ang subsidiary sang San Miguel Corporation. Bantog gid ining kasimanwa ta sa industriya sang telekomunikasyon kay siya ang nagpadako kag nagdul-ong sa kung ano ang kahimtangan subong sang Smart Communications. Telecom "wizard" ang bansag sa iya bangod sa pinasahi nga pagdumala sa amo nga kompanya.
Sang ginbakal ni Manny Pangilinan ang PLDT Group kon sa diin apil ang Smart gilayon nga nagtuga sang kontrobersiya sa tunga ni Martirez kag Napoleon Nazareno pero ang ulihi ang gin-apinan ni Pangilinan samtang madamo ang naghuna-huna nga si Martirez na ang magadumala sa Smart Communications.
Sang ulihi nagkadto si Martirez sa Indonesia kag didto nangin presidente siya sang ikatlo nga telecom operator tubtob nga sadtong 2009 sang ginkuha siya sang Quatar Telecom nga magadumala sang wi-ribe brand sa partnership upod sang San Miguel Corporation.
Nahibal-an naton nga dako gid ang bilib sang QTel kay Martirez bangod sa bisan malip-ot lang nga ti-on asta 50,000 ang nangin subscriber sang wi-tribe sa Metro Manila sang gin-offer nila ang WiMAX technology nga sa diin dako nga parte sang kliyente ang nakuha halin SmartBro, Globe Tattoo kag Sun Broadband Wireless o SBW. Suno sa aton nahibal-an indi in good terms si Martirez sa mga finance people sang SMC. Kunsabagay biskan diin mo ibutang kontrahanay gid man ang sales kag finance kay ang luyag sang sales iya gastos agod makakuha sang damo nga kliyente samtang ang finance naman iya indi gusto magpaguwa sang kuwarta, luyag iya nila mahakot lang sang ginansiya.
Suno sa balita ginpabalik sang QTel si Martirez sa Indonesia kag gin-islan siya sang isa ka Norwegian bilang bag-o nga presidente sang wi-tribe Telecoms, Inc.
